噚日有位國內HR同我傾完請人嘅事之後，連隨喺電話度問咗一個問題：「想去香港旅遊，有建議嗎？」
「我的建議是，別去。」
其實我對佢冇乜好印象，幾個月前幫呢間公司請人，佢話要日文流利，因為要陪老細見日本客，我將幾份CV send咗過去之後一直冇回音，隔咗幾日佢又再要求更多CV，我話唔識搵喇，上次嗰幾份已經好好，然後呢位國內HR講：「你上次給我的太low了，至少N3以上吧！」
我畀咗3份CV佢，3個candidate都係N1......
無知，係最可怕。佢幾日前已經問過我一次關於香港旅遊嘅事，原來佢睇國內新聞知道譚詠麟同埋梁家輝出席撐警（而佢完全唔知道邊個係鍾鎮濤😂點搞呀B哥，同香港人割蓆而國內人又識你老鼠，total loss喎🙈），呢位HR一開始接收嘅資訊已經係香港有90後搞事，有人阻住警察返工，所以啲明星就要出嚟主持公道，收咗線之後，佢仲send咗呢張截圖畀我，係國內網民對今次事件嘅睇法同評論，唔知點解，我冇嬲，反而覺得佢哋幾慘。
封鎖消息操控民意，剝削人民知情權營造和諧，其實呢位國內HR都唔想咁無知，或者佢根本唔知道自己係無知，因為佢完全冇機會去知。
藍絲定黃絲係個人選擇，最怕你連知道真相，接收資訊嘅機會都冇，政府餵乜你就食乜，大家唔再有判斷力，武漢最近都有騷亂，但部分國內人真係完全唔知道有呢件事。
早兩日FB、IG、WhatsApp局部癱瘓，睇唔到片、send唔到圖、聽唔到voice msg，有冇幻想過從今以後香港人都要翻牆嘅畫面？
Search